पाँच दिन आइसोलेसन बसेपछि ढुक्क लक्ष्मी

0
49

२१ वर्षीया लक्ष्मी वली चैत ४ गते बिहान १० बजेतिर कतार हुँदै काठमाडौं आएकी हुन्।

उनलाई घर पुग्न हतार थियो, सोही दिन काठमाडौंदेखि बसमा दाङको लागि यात्रा तय गरिन्। ५ गते बिहानै तुल्सीपुर आएकी उनी २ घण्टाको थप यात्रापछि पश्चिम ट्वाँङखोलास्थित घर पुगिन्।

चैत १२ गते एकाएक उनलाई खोज्दै प्रहरी घरमै पुग्यो। कोरोना संक्रमित युवतीसँगै जहाजमा आएको भन्दै लक्ष्मीको खोजी भएको थियो। किनकि एकै दिन कतारबाट आएकी काठमाडौं निवासी एक किशोरीमा कोरोना भाइरसको पुष्टि भएको थियो।

आउँदा ठाउँ(ठाउँका एयरपोर्टमा स्वास्थ्य चेकजाँच हुन्थ्यो। उनलाई ज्वरो, रुघा खोकी त्यस्तो कुनै लक्षण थिएन। कतारबाट आएको १० दिन बितिसकेको थियो।

एकै दिन आएकी युवतीलाई कोरोना देखिएपछि लक्ष्मीले जहाज एउटै भए नभएको एकीन गरिन्। लक्ष्मी र काठमाडौंकी संक्रमित ती युवती एकै दिन कतारबाट आए पनि जहाज फरक परेका थिए।

‘मेरो फ्लाइट १७ तारिख दिउँसो ३ बजे कतारबाट भएको थियो,’ लक्ष्मीले भनिन् ‘संक्रमित भनिएकी युवतीको छुट्टै थियो।’

यही कुरा उनले घरमा पुगेका प्रहरीलाई सम्झाइन्। प्रहरीले मानेनन्। बबईको ट्वाङखोलाबाट ल्याएर उनलाई तुलसीपुरस्थित राप्ती प्रादेशिक अस्पतालको आइसोलेसनमा राखियो।

‘म सुरक्षित छु भन्ने ढुक्क थिएँ’ लक्ष्मीले थपिन् ‘तर पनि समाजको आशंका मेट्नु थियो, म प्रहरीसँगै गएँ।’ तुलसीपुरकै बेलझुण्डीस्थित कोरोना विशेष अस्पतालमा उनलाई लगियो। ज्वरो, खोकी जस्ता कुनैपनि कोरोनाका संकेतहरु उनलाई थिएन।

त्यहाँ पुग्ने लक्ष्मी पहिलो व्यक्ति थिइन्। दोस्रो दिनदेखि अरुपनि आशंका गरिएकालाई त्यहाँ लगियो। अस्पतालले नमुना संकलन गरेर काठमाडौं पठाइसकेको थियो। कोरोनाले झुक्याउँछ भन्ने कुरा लक्ष्मीले सुनेकी थिइन्। चैत १६ गते साँझ अस्पतालको एक्लो कोठामा अनेक कुरा सोच्दै थिइन्।

त्यही बीचमा चिकित्सक आए। ‘चिकित्सकले तिमीलाई एउटा कुरा भनौं कि नभनौं भन्नु भयो। मनमा आँधीहुरी चल्यो,’ लक्ष्मीले भनिन् ‘तर, उहाँ खुसीले मुस्कुराउँदै भन्नुभयो तिम्रो रिपोर्ट नेगेटिभ आयो, लौ बधाई छ।’

उनले तुरुन्तै घरमा आमा आशालाई फोन गरेर उक्त कुरा भनिन्। केही बेरमै लक्ष्मीलाई लिन बबई गाउँपालिकाको गाडी आयो। राति ११ बजे घर पुग्ने बेला उनकी आमा आशा बाटोमै लिन आइन्।

लक्ष्मी ५ दिने आइसोलेसनपछि आइतबार राति मात्रै घर फर्किएकी हुन। टेकुस्थित राष्ट्रिय जनस्वास्थ्य प्रयोगशालामा गरिएको परीक्षण रिपोर्टको आधारमा लक्ष्मीमा कोरोना भाइरसको संक्रमण नदिएपछि उनी सोही दिन नै तुलसीपुरको बेलझुण्डीस्थित कोरोना विशेष अस्पतालबाट डिस्चार्ज भएकी थिइन्।

आइसोलेसनमा बसेकोमा उनलाई कुनै आपत्ति छैन। बरु ढुक्क भएकी छिन्। बाहिरबाट आएका जो कोहीलाई जाँच गराउन उनी सुझाव दिन्छिन्।

अहिले परिवार र समाज नै ढुक्क भएको उनी बताउँछिन्। ‘यदी जाँच नगरेको भए मनमा कुरा खेल्ने ठाउँ रहन सक्थ्यो, अहिले त ढुक्क भएँ’ उनले भनिन्।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्